زهــــــــيري جديد روووعــــة

زهيريات2
1
كلبي بغرامج تخربط منهو اليرتبه
لاني بحفره بهواج ولاني برتبـــه
الهج باسمج ولا بانت علي رتــبه
واي اسم غيرج على الساني انه محرمه
والشخصج بهل كلب دون البشر حرمه
عاجبني طولج اذا تمشين مو حرمه
أمر لواء وخطم بس عايزج رتــبه
2
دموع النواظر جرت من شوگي لك دم دم
ودكات گلبي وحياتي تنسمع دم دم
وجروحي انا لخاطرك خليتهن دم دم
لاكن گليبي بعد مايحتمل طك طك
وضلوعي تعزف الك لحن البعد طك طك
ولن انته مني جزء احجيهه لك طك طك
طكت بيوم الرحت وسط الصدر دمدم
3
مجنون يامن صحت طفوني شب داري
جانو هلي وعزوتي وهم شبب داري
واليوم انظر على داري وشب داري
بس الصخر والصدى يجاوب عليكم وعد
زلات يحسب علي وانا احسبه وعد
واعدني دهري وعد ماشفت مثله وعد
لويشل ايدي ورجل لو بشب شب داري
4
حروف اليالي تاهن عليه
بقرن.
وبعد الغوالي فلا يرهم لغيري
قرن.
تمر الدقيقه بشهر ويوم وعندي
قرن.
ودولاب گلبي مع ماطور الحزن
ساهم.
وشايل دليلي عذاب بشوگ
ونساهم.
تدري ايمت اترك هوى الغالين
وانساهم.
يومن تشوف النمل شايل وحيد القرن
5
ياصخط رب العرش هز دارهم ولها مر
وأمريكا الها اجل أتفارجك ولها أمر
ولها مثل ماجرى بينا ظلم ولهاأمر
ونرميك هي ذمتك باثوب ياكاضي
ويهب عليك نسيم دهوك ياكيضي
من اجل هذا جمعت الحجر ياكاضي
ظميتو لزغار باجر يرجمون الهمر
6
يا صاح وسفة الوكت عن صحبتي دارك
وخلاك تمشي بوهم وانت الكلب دارك
انت الرضعت الفهم والحلم من دارك
وانت عزيز الكلب الروح منساها
صحبتك ما تنسي لتصدك انساها
ونجان هذة الوكت خلاك تنساها
خسران هذة الذي عن صحبتي دارك
7
انتا يغالي الكلب هم صاد من عدنة
وعدينا كل العمر ماجزنة من عدنة
شفناك مالك خلك هل يوم من عدنة
وانتة جمالك بنا فوك الكصور اكصور
واعذرنة يا يبن الناس لو بان منا اكصور
طولك عبالك رمح وحنا يا غالي اكصار
مابيك عيب وغلط العيب من عدنة
8
ألروح جانت گبل أسباب وانهنتي
وهساع بجفاي شفتي الضيم وانهنتي
شگد نصحتج واوجه بيج ونهنتي
مافاد بيج النصح گلبج علي منگلب
وجفي بسجل العمر مابي فرح من گلب
شفت أنه غيرج بنت وحبيتها من گلب
ويومن علي گربت دحگت وانهه انتي
9
مارحتي هاذ الگلب بوصال مرنتي
ومرنتي گلبي على الهجران مرنتي
ردنه تمرين مره بشوگ مره انتي
ماردنه منج ذهب بس شوف وجهج بس
وشحيتي بواصلج ليما هرشنه يبس
حلو وشبيه الگمر وخدود تسحر بس
مره انتي رغم الحلات البيج مره انتي
10
الدهر صوب علية سهام غدارة
وبحكام جور وظلم للطيبين غدارة
ادري بيهود العرب بيهم ناس غدارة
بدرب العمالة مشو ماعدهم رحم لحد
لا دين ألهم لا نهي لا ناصح ولا حد
ليش عليك عتب باطل يازمن لحد
ترضى مصيري السجن بجوار غدارة
11
ضنيت حبك من الاحزان سلم لي
سلمتو گلبي وعذاب وضيم سلم لي
ان جان انته يساهي العين سالم لي
خلهه تجره علي بلضيك گصابه
فدوه لشعرك عليه تلوگ گكصابه
انته لمثلك شبيه السيف گصابه
والي بهاون ويگع ان طاب سلم لي
12
حنظل خلاف المشو ياصاح حك الهم
بيدي زرعت الوفه ولا ضاع حك الهم
حكهم سعاده وانا مغبون حك الهم
جازوني حك الربى خلوني حاير والف
وياحيف عكب المضه للغير صارو ولف
ضليت شبه الهرم شايل بجيسي والف
اركض واجر بالتتن بالراس حك الهم
13
اصل اشفايف من عسل واصل العسل من تمر
حتى بعذابك حلو كللك حلو من تمر
لأزرع دروبــك ورد ويخضرن من تمر
كون اوصل لركبتك واندك عليه واشم
وبجيدك اقضي العمر بين الروايح واشم
يأجمل الناس ياحبيب وطيب واشم
بس اعتب عليك ماتدك بابنا من تمر
14
من عندي لاتقترب هو انته شوفك سكر
ولوهاي ادي مستك بجروحي يصعد سكر
اذوب وكت الدفومحبوب كــــلك سكر
من وكفتك بل درب ارجوك بلله بطـل
ومن عندك اني خفت واكف وكفت بطـل
مااسكراني ابدشربني ميت بـــطــل
بس من اشوفك احس بل كون كله سـكر
15
هامات كبل بعلو وكت السقوط اسقطت
واخلاق بعض الربع مدري شبلاها اسقطت
ياريت ام النذل باول حملها اسقطت
من جان قطعة لحم ومن الشهور اربعة
وياحيف باع الوطن باوراق مية اربعة
سوه جرح بالكلب تاريخ 9/4
حتى طفلنا بجه بغداد يوم اسقطت
16
ابمنخل احزان الزمن حط العمر ينخله
شكد صعبه حظن النهر من ميه لو ينخله
كلمن يطيح بعسر من ينظنك ينخه الله
وغير الله انخه منو انخا وحسبه كرب
فلاح غيري حصد وفلاحي توه كرب
ظليت بس الجذع لا من سعف لا كرب
ويوميه هزي رطب هزي رطب ينخله
17
طارت طيرو السعد ماوگع بس طيري
وماكو لحن للحزن ياصاح بس طوري
اكتب مغثه واسه من اليوم بسطوري
علي جفاني وعصركلبي بغيابو عصر
ومحد مثل حالتي اصبح بهاذا العصر
اگدر انساها الصبح وانسه الظهر والعصر
بس جاني لغروب واحبابي مالهم طاري
18
ياصاح من بسمتك جو البكلبي صفا
غربلت وزن الربع بس وزنك انت صفا
قاسي كلبك علي يفلان صاير صفا
لجل عينك ماهبت للموت وديني
ومثل عاشك صرت يكول بشوك وديني
اي وحق من انزل القرأن وديني
حبي الك بكد من سعى مابين مروة وصفا
19
يا صاح ثار ودمه هذا الوكت طالبه (أطلبه)
وخلال ينطي العشك بس للعرف طالبة(لب العشك)
مكتوب الي شما صرت من طلابه أخش طالبه(مشكلة)
يا دنيا طلعي شبقة من الحقد ظهري (طلعيه)
ومن الطريق تعبت ياماانكسر ظهري (الظهر)
كلت الدوام الصبح ثاري العكس ظهري(دوام الظهر)
ويوميه ضارب ركن عود أنتظر طالبه(طالبه مدرسة
20
ياصاح ماظل اخو بالدنبا ضاع الوفا
وحزام ظهري طلع ذيب وابد ماوفـــا
شنه الجرة هالوكت ياصاح وشلوفـــا
وخلة الصديق الذي كلبي اب صادقـــة
وانطاه حب ووفـــة وبنية صادقـــة
من دون كل البشر لو خالفوا صدقــة
تاليه يطلع نذل خاين عديم الوفــا
21
يا منيت الروح عضمي بين كسر وجبر..
تجبرني لمحبتك واعضاي كلها جبر..
من اجميله تسوى الف ومليون من الجبر..
تسوى الشبالي شلع والعيثه والمصطفى..
كثران دمع العين رايب ابد ما صفى..
ابجاه رب العرش وحبيبه المصطفى..
... تنجح بدرس الادب والهندسه والجبر
22
المثقال ماينعرف لوماكو كيلو وطن
وياحيف روس النخل وعله الجوالي وطن
اسيوف دهري ولن لاخر دليلي وطن
من حيث هذا الجرح ماضن يصحله دوه
امعثر ابخطوته بدرب الوحاله دوه
دمع القلم لو نشف يرجع يلاكي دوه
ويذرف دمعته ابحزن للي مضيع وطن
23
ماغاب طيفك عن عيوني ولا تنور
ولمن نجي على الصدك تميل وتناور
وكلما اكلك ذبت اتكلي اتنة ور
كلبي بغرامك والكك بيتن بنصة عمر
وصدك شما ابلعو يا منيتي بلعو مر منة
منة تقل حلاة البشر كلما كبر بالعمر
بس انت طبع الكمر من تكبر تنور
24
ضليت انوح بحزن مهموم انعي وأرد
على هالغوالي الكبل جانولي مثل الورد
اغرف اغرف يكلبي من بحور المرار وأرد
ليما يسلك انين بجاك والاف افة
ما اطلبت ضعنهم حيفاً علية وأفة
يا دار اهلنة جذب لولج معاهم وفة
ماجان بيجة نبت عكب الغوالي ورد
25
اياك تشمر حجر گلب المحب ترجمة
خلص سنينه بقهر وبياذنب ترجمة
كثير عندي قصص بالحب يخي ترجمة
خاف احجي بيهن انة ويضيگ بية النفس
طبع المحب من يحب يبذل بغالي النفس
مو ذنبي ذنب الوكت ادرس بعلم النفس
والاشد منه وامر حبيت بالترجمة
26
شنهو الجرى يا ترف وجهك عليه ثكل
وهم الذي على الكلب ياصاح زاد وثكل
ومن عكب ذاك الوصل جدمك عليه ثكل
كلت تعبان الترف ما كدر ليه يمر
وجرعت مر الوكت وجرعت حبك امر
اطلب تدلل علي انت تأمرني امر
بس ليه عندك رجى لا تبيع ابراسي ثكل
ميزتك كلش ترف وشفاك حامض حلو
حطيت رسمك لغز وكلتلهم اني حلو
حليتة وتعذروا صفكولي كالوا حلو
كالولي نقطة ضعف عندك كلت نقطة
تذبل لون الجفن ذب عالوجن نقطة
واسمك بثلث نقط واسمي بلا نقطة
اجمل شخص بالارض انتة واكولن حلو
27
من مال بية الوكت ضعن الموده سره
و الجان الي بي رجه بكليبي فرغ سره
مفضوح ضل الكلب للناس سولف سره
جيه دنيتي بلردة وياي ذبت عمل
مسكين ضل الكلب عليه شجنة و شعمل
الناس كله مشت كلمن لكالة عمل
بس اني لمن رحت كلولي الزم سره
28
ليل او قصايد شعر او حلوات تعزف عود
وتنادي عل لي هجر امعود علينه عود
منك نحيل الجسم باقي دشوفه عود
ساتر عليه الهدم ارحم حبيبك عاد
شخصك صفه جنته مايبغي جنة عاد
بشره ابخبر جيتك بشره حبيبك عاد
الدنيه سبة وكت ماتسوه كسرة عود
29
ياصاح بيضة اودادك ما وراه صفر
او منهو من العواذل بذنك اعليه صفر
معتدل لونك او لوني من التجافي صفر
انبيك كلبي وصل للموت وشرافه
إي والنبي والعرش والبيت وشرافه
عندي من اشوفك اهلال العيد وشرافه
هاي المروه من اجيك اتكول لاهل صفر
30
يلي جمالك حسن منسوخ من سومر
منك شرابي زهر والزاد هجسو مر
والوجه من وگفتي براس الفرع سومر
شنطيك مني بعد من لحمي لك تكه
كصيت وانته ابد مثلك فلا تكه
من ضيم هجرك يول يوميه اجر تكه
واسئل شحال الذي يشرب تتن سومر
31
تيهت دربي وتهت لمن شفت..... شامتك

ضل يمي لا تبتعد يفرح ولك...... شامتك

شامات بالخد شفت بس بالصدر شامه تك

صورك رب العرش وبيك الحسن. دكه لك

سواك مثل الكمر وبالحنج حط... دكه لك

ومن يدك كلبي اعتقد دكه الي ..ودكه لك

يل بيك عطر الورد شكد طيبه يا ..شمتك
32
نهـران دمـنه يـصـب محـد عـلينه ســال
والگاع منه ارتوت يجري ابغزاره وسال
لا ولد عــم انـتخوا ولا سيـف واحد سـال
يتفرجون اصبحوا وانباگ وسفه الوطن
وهامات ولـدك ابـد .. للاجـنبي ما وطـن
يا حيف أخذنه العصف وبليل دوه وطن
المات بينه مات ... والناجي ابقهره سال
33
إشـحده اليمـس تربتك شحـده الذي يـدنته
إدروع كــلنه الـك وحده اصـبحـت يــدنـه
وانعيد ماضي الزمن وگفات من يدنه (جدنه)
من (بالرميثة) شـچـخ ابگلــب العـدو فاله
مگـواره مـا فارگــه .... فال النصر فاله
بـحبـال جـدمه عـگـر .. ابدن فلا فــالــه
حـالف يبيد العـدو ... ابروحه لون يـدنه
34
نور هجرك سحر تو بالدليل وعام
عالهل فراكو يصاحب ما يفارب عام
وامسيت حال اليتيم اللي لا لو ابو ولا عم
مبعد علية الفرح مرة بجذب لا يجي
ومن دون كل البشر بس لية الحزن لايجي
كولوا للعيد هالسنة بلية زعل لايجي
خايف ان جاني العيد افطن عالجرالي العام
35
ما ارد حبيبي الك صدكني هذا وعد
و لا تكلي شنهو السبب احسب اجروحي وعد
و لا تعتذرلي بعد و لا تكلي ارجع و عد
ولا تخابرني ابد و معزتك ما ارد
جرحتني لمن جنت بايدك جني مارد
كلبي يدك بحبك و انت الي بي مارد
ما ارد حبيبي الك صدكني هذا وعد
36
اريد انزل على ديرتكم وأمرهة
وانسة هموم دنيانة وأمرهة
انا روحي الطايعة لروحك وأمرهة
ولاتظن حبيبي بعدك عشت ونسة آني
كلبك من هجرني يبعد الروح ونساني
هم العلية ما يحملة الجن وإنساني
ضكت منك حنظلهة وعلگمهة ومرهة
37
إشـما يجور الزمن تبگـه انته عالي وأشــم
مرخــص اضـلوعـي الك طرزهــه بحله وشـم
من غير عـطرك ابد .. لتصدگ اهـوه وشــــم
مـن حيـــث يا زيــن حبـك وسـط دمي ســره
يلي عــله شـوفتك وگفـت الوادم ســــــره
لحـلـف وحــگ اــلذي ... لمسجد الاقصى سره
نجـمي تره ابفـرگتك ينذر إبمحنهوشــــوم
38
ما يـوم انتـه اغـلطـت گلت الاحــبة أمــر
واجــرعــنه من فـرگـتك ســم الفراگ وأمر
ادلّــل علـينه يـمـن رغـباتـه صارن أمــر
يـلي ابرمــش عـين ولفــك ســاكن وحاجبـه
نـورك علي ليـش انتـه بكل بخــل حــاجـبه
لتصــدگ ابـيوم عـطـفـك انـه لي حـاجة به
لاچـن ضميري الـذي هـزني .. وبـذلك أمــر
39
ياعين دم ودمع بفراكهم صبي
وأترس بكاس الحزن حيل وبعدصب بي
بدواي محدعرف مسلم ولا صبي
واني طعين الكبد لاميت ولا حي
تانيت محد اجه منهم ولاحي
ان جان اني اصبحت لاهلي ولا حي
دنياي حيل اعكدي وفوك العكد صبي
40
بجروحي يلعب لعب وبس هالجرح خلة
وياوكت بس يلچم راد الگلب خله
ومن كثر ضيم الهوة صاب العقل خله
ما اعتب على الهوى وياك چي ما طاب
بس اعتب على الجدم حيف على بيتك طاب
داويت جرحك بيدي واتعبني لمن طاب
ومن صار بيه الجرح حفنة ملح خله
41
من على شوفتك محتام اجيلك ورد
عطشان اجي بلهفتي ارشف اشفافك ورد
بدمعي سكيتك زرع ما شفت منك ورد
من حيث عكب التعب زرعك الغيري صفة
وبكاسي مايك خبط وبكاس غيري صفة
سبعة المضن يا ترف كلهن وداد وصفة(سبع سنوات من المحبة)
تنساهن بياذنب جاوب سؤالي ورد
42
ياماخذ الروح ردها الخاطري ردهــه

ومن يوم هدت زلم چفي الك ردهه

ومن صابك انت المرض گلبي فتح ردهه

ومستشفى كلي صرت ومنك ردتلي اجناح

كسّرت جنحي وطرت هم تنكسر يجناح

بياذنب تحكم عليّ يامتــــــــــهم يجناح

كيديه تالي اصبحت والقاضي الي ردهه
43
لوجار وكتي علي ماكول ابد ايجار
تاما اشف البعيد ومااغث اي جار
يعراك حبك غدة دم بوريدي جار
فلوجة زاخو ونجف بعكوبة حلة ام قصر
كلهم سنادي نكشف ماظل طويل وقصر
مسكن بغير الوطن لوملكوني قصر
وابقى افتخر بالعراق وساكن بايجار
44
الغيري يغالي صرت وانتة الجنتلي ورد
وضليت بس وحدي ابجي وانعي ورد
غصبن علي اجي العرسك واسلم ورد
واضحك ولو هل الكلب نابات بس لاكن
وبكلبي اكول بحزن ريت الجرة لاكان
ما هي قليلة علي يا منيتي لاكن
مجبوراهني واجي وانثر بعرسك ورد
45
العشك دربو عسر والشوك دلالي
ويبيع برخص ثمن فرحات دلالي
مني زغير الفرح كاتب عهد لالي
بالظيم حالي يناس شلون شدعاني
تيهت جدمي بدرب الليل شدعاني
دحج يزين الوصف فركاك شدعاني
موزين صابر لحد الان دلالي
46
من هم دليلي الحزن زود حزن ونهم
باسباب ذاك الگبل نركض وراه ونهم
چانو بعيني جبل ياصاحبي وانهم
جوه الوطيه بثلث ارباع وازياده
ونارك بگلبي اشعلهه وحيل وزياده
قسمت گلبي على العشاك وزياده
انطيه هديه للي يجيب اخبار لي منهم
47
صرح المحبه انبنه بس عفته اني....شُهر
امنته سر العمر وبسري ذاع و.......شهر
وماطول بعشرته يادوب شفته.....شهر
وانه الچنت ساعده واتمنى خدمه...اسد
ولو ادري طبعه غدر ابواب گلبي....اسد
اعزل اجيته وخفت وهوه گدامي...اسد
وياهو اليجابه اسد لو حتى سيفه شهر
48
محلاها شمس الصبح كل يوم بالجامعه
الحسن بيها قمم من كل حلو جامعه
وان جان حبك قسم حبي الك جامعه
الحسن كله الك يا بو قسم ترجمه
نظرات عينك حجر يا هو اليجي ترجمه
نظرات عينك حجي ارجوك وك ترجمه
تدري لوما عيونك ما اجي واطب الجامعه
49
ياصاح خلي الگلب وكت الشدايد يلد
والخوف لو يگربك بلصوط يلده يلد
لتگول جسمي ضعف بس ظال عظم و يلد
المهم عزمك يظل مثل البحر رايه له
و ابخيمة اهل العگل زين الزلم راي اله
شخص اليذل النفس ما ترتفع رايه له
و كون الجبان و غبر ابتر يظل ما يلد
50
كلمن ضحكلك جذب صدك تره جاملك
ولمن اشوفك تجي افرح واكولن اجه ملك
صوره جميله صرت وانه صبحت جامه الك
بس عني لمن رحت ضلت عيوني ترف
عايش حياتي عدم وانت حياتك ترف
صح انت ربك صورك وانطاك طيبه و ترف
بس عمري ما جاملت وهسه صبحت اجاملك
51
وياك راح العمر بالحلوة والمُرَّه
وما راح من عمرنا ما عاد بالمره
ولو كنت تزعل علي مره بعد مره
وأرضيك وأرضى عليك وبلب على حالي
من يوم لازم يجي وأكون أنا لحالي
ما كن عشنا سوى بالمر والحالي
ومن فات ما مرني معقول أنا أمره

» اغـــنية مـاهر احمد حب جديد...